ព័ត៌មានជាតិ

អាហារដ្ឋានស្មៅទន្លេ ក្រុងកំពង់ចាម បានចូលរួមទប់ស្កាត់ ជំងឺកូវីដ១៩

បានផុស

៤ years មុន

នៅ

ថ្ងៃពុធ ៩ ធ្នូ ២០២០

ដោយ

អាហារដ្ឋានស្មៅទន្លេ ដែលមានភាពទាក់ទាញដ៏ខ្លាំងមួយរយៈកន្លងមកនេះ នៅក្នុងក្រុងកំពង់ចាម ដែលអ្នកទេសចរភាគច្រើនមកថតរូបសិល្បៈប្លែកៗ អមដោយទេសភាពដងទន្លេមេគង្គ និងជាកន្លែងអាហារដ្ឋាន ផងនោះ កំពុងបានចូលរួមប្រយុទ្ធប្រឆាំង ការពារ និងទប់ស្កាត់ការឆ្លងរីករាលដាលជំងឺកូវីដ១៩ សហគមន៍ ខណៈបច្ចុប្បន្នកម្ពុជារកឃើញអ្នកវិជ្ជមានវីវុសកូវីដ១៩ជាច្រើននាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ប៉េង ឈុន ដែលជាម្ចាស់អាហារដ្ឋានស្មៅទន្លេ ក្នុងក្រុងកំពង់ចាម បានឲ្យដឹងថា ក្រោយពីមានព្រឹត្តិការណ៍២៨ វិច្ឆិកាមក និងអនុវត្តន៍តាមវិធានអនាម័យ ការបង្ការការពារទប់ស្កាត់ ជំងឺកូវីដ១៩តាមសហគមន៍នោះ អាហារដ្ឋានលោក បានរៀបចំបំពាក់ម៉ាស៊ីនបាញ់អាល់កុលលាងដៃស្វ័យប្រវត្ត ៦ គ្រឿង ម៉ាស៊ីនវាស់កម្ដៅ និងបានរៀបតុអង្គុយដោយមានគម្លាតសុវត្ថិភាពរបស់តុនីមួយៗ ដាក់ដបបាញ់អាល់កុលតាមតុ និងបុគ្គលិកម្នាក់ៗក្នុងអាហារដ្ឋានមានពាក់ម៉ាស់ និងក្បាំងមុខ សម្រាប់ការពារជានិច្ច មិនត្រឹមតែប៉ុណ្ណោះ អាហារដ្ឋានស្មៅទន្លេបានបិទមួយរយៈសម្រាប់បន្ទប់ទទួលទានអាហារដែលមានម៉ាស៊ីនត្រជាក់។

លោក ប៉េង ឈុន បានបន្ថែមទៀតថា មួយរយៈនេះមិនសូវមានភ្ញៀវឬអ្នកទេសចរថតរូបមកលេងកម្សាន្តច្រើនទេ តែទោះបីយ៉ាងណាក្តី សម្រាប់អាហារដ្ឋានស្មៅទន្លេ កំពុងបានចូលរួមការពារ ទប់ស្កាត់ ជំងឺកូវីដ១៩ ស្របតាមការណែនាំរបស់ក្រសួងសុខាភិបាល ក៏ដូចជាការចូលរួមចំណែកជាមួយអាជ្ញាធរខេត្តឲ្យបានខ្ជាប់ខ្ជួន និងបង្ហាញភាពកក់ក្ដៅដល់សុខភាព ផាសុកភាពដល់ភ្ញៀវមកលេងកម្សាន្តអាហារដ្ឋានស្មៅទន្លេនេះ៕