ព័ត៌មានជាតិ

គ្រោះទឹកជំនន់ បានសម្លាប់មនុស្ស៤៧នាក់ និងប៉ះពាល់ដំណាំរាប់ម៉ឺនហិកតា

បានផុស

៤ years មុន

នៅ

ថ្ងៃព្រហស្បតិ៍ ១០ ធ្នូ ២០២០

ដោយ

យោងតាមទិន្នន័យផលប៉ះពាល់នៃជំនន់ទឹកភ្លៀង និងជំនន់ទន្លេមេគង្គ នៅឆ្នាំ២០២០របស់គណៈកម្មាធិការជាតិគ្រប់គ្រងគ្រោះមហន្តរាយ ដែលទើបចេញផ្សាយថ្ងៃនេះ បានឲ្យដឹងថា ជំនន់ទឹកភ្លៀង និងជំនន់ទន្លេមេគង្គ នៅឆ្នាំ២០២០នេះ បានធ្វើឲ្យប៉ះពាល់ដល់រាជធានីខេត្តចំនួន២៣លើកលែង ខេត្តកែប និងរតនគីរី បណ្តាលឲ្យមនុស្សស្លាប់សរុបចំនួន៤៧នាក់ ប៉ះពាល់ដល់ប្រជាពលរដ្ឋ ២២២ ៨៩៨ គ្រួសារ និងជម្លៀសប្រជាជន១៧៥១៧គ្រួសារ ដោយប្រើប្រាស់កម្លាំងជួយសង្គ្រោះប្រមាណជិត៣ម៉ឺននាក់ និងមធ្យោបាយប្រមាណជិត១៥០០គ្រឿង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាការណ៍ដដែលបានបន្តថា ជំនន់ទឹកភ្លៀងនិងជំនន់ទន្លេមេគង្គ បានបង្កឲ្យមានប៉ះពាល់ពាល់ដល់ស្រូវលិចទឹកចំនួន ៣០៤ ៨២១ ហិកតា និងខូចខាត ១២៥ ៧៧០ ហិកតា។ លិចវត្ត២៥៣កន្លែង សាលារៀន៩៤៣កន្លែង ប៉ះពាល់ផ្លូវជាតិ ផ្លូវខេត្តនិងផ្លូវក្រុង៦៧៣គីឡូម៉ែត្រខូចខាត២៣២គីឡូម៉ែត្រ ផ្លូវលំជនបទ៥៣៨៩គីឡូម៉ែត្រខូចខាត៣១៥៤គីឡូម៉ែត្រ និងប៉ះពាល់ដល់ប្រឡាយមេ ប្រឡាយរងនិងប្រឡាយស្រោចស្រពចំនួន៧០២គីឡូម៉ែត្រ។ របាយការណ៍ដដែល បានបន្តថា ជាមួយគ្នានេះដែរ រដ្ឋាភិបាលបានចែកអំណោយសង្គ្រោះដល់ពលរដ្ឋរងគ្រោះដោយទឹកជំនន់បានចំនួន២៨៧៩២៧គ្រួសារ ដោយគ្រួសារដែលរងគ្រោះធ្ងន់ធ្ងរទទួលបានអំណោយ២ដង។

លើសពីនេះទៀត រដ្ឋាភិបាលបានស្តារឡើងវិញ នូវស្រូវនិងដំណាំរួមផ្សំមួយចំនួនបានប្រមាណ៩ភាគរយ ក្នុងនោះ បានផ្តល់ពូជស្រូវមិនប្រកាន់រដូវចំនួន៦៤៣៤,៣៩តោនដល់ប្រជាកសិករចំនួន៦៤៣៤៣គ្រួសារ និងផ្តល់គ្រាប់ពូជបន្លែនិងដំណាំរួមផ្សំចំនួន ៥៥៨ ២៤៧កញ្ចប់ដល់កសិករចំនួន៩៣០៤១គ្រួសារ។ ក្រៅពីនេះ បានជួសជុលផ្លូវលំជនបទសំខាន់ៗនៅខេត្តបន្ទាយមានជ័យ បាត់ដំបងនិងខេត្តពោធិ៍សាត់មុនគេក្នុងចំណោមផ្លូវលំជនបទ ដែលប៉ះពាល់៥៣៨៩គីឡូម៉ែត្រខូចខាត៣១៥៤គីឡូម៉ែត្រ។ ចំណែកផ្លូវជាតិ ផ្លូវខេត្តនិងផ្លូវក្រុង៦៧៣គីឡូម៉ែត្រខូចខាត២៣២គីឡូម៉ែត្រ ត្រូវការជួសជុលបន្ទាន់ចំនួន៣៧ខ្សែប្រវែង១៦២គីឡូម៉ែត្រ៕

អត្ថបទ៖ សំអឿន

សូមចុចអាន៖ ទឹកទន្លេឃុំឆ្នុកទ្រូ ដែលធ្លាប់មានផ្ទះបណ្ដែតទឹកមិនរៀបរយ បានប្រែក្លាយសោភណភាព

Related Topics:គ្រោះទឹកជំនន់