ព័ត៌មានជាតិ

លោក ឡុង ឌីម៉ង់ ៖ ថ្ងៃ៧មករា គឺជាសច្ចធម៌ពិត នៃប្រវត្តិសាស្ត្រ ហើយអ្នកប្រឆាំងនិងថ្ងៃ៧មករា ក៏បានរស់រានមានជីវិតដោយសារថ្ងៃនេះដែរ

បានផុស

៤ years មុន

នៅ

ថ្ងៃចន្ទ ១១ មករា ២០២១

ដោយ

លោក ឡុង ឌីម៉ង់ ឯកអគ្គរាជទូតកម្ពុជាប្រចាំសាធារណរដ្ឋកូរ៉េបានមានប្រសាសន៍ថា ដោយសារតែមនោគមវិជ្ជា ដោយសារតែបញ្ហានយោបាយ ធ្វើឲ្យមនុស្សយល់ខ្លះយល់ខុសៗពីបញ្ហាថ្ងៃ ៧មករានេះ តែទោះជាយ៉ាងណា ថ្ងៃ៧មករា គឺជាសច្ចធម៌ពិត នៃប្រវត្តិសាស្ត្រ ដែលប្រជាពលរដ្ឋទាំងអស់ រួមទាំងអ្នកប្រឆាំង ៧មករា ផង ក៏បានរស់រានមានជីវិត ដោយសារថ្ងៃ៧មករា នេះដែរ ដូច្នេះត្រូវចូលរួមធ្វើយ៉ាងណាឲ្យស្មារតី ៧មករា នេះ គង់វង្ស ស្ថិតស្ថេរតទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបញ្ជាក់ប្រាប់កម្ពុជាថ្មីរបស់លោក ឡុង ឌីម៉ង់ នេះ បានធ្វើឡើងបន្ទាប់ពីលោកបានរៀបចំមីទ្ទិញអបអរសាទរខួបអនុស្សាវរីយ៍លើកទី៤២ ទិវាជ័យជម្នះ៧មករា (៧ មករា ១៩៧៩ – ៧ មករា ២០២១) សាធារណរដ្ឋកូរ៉េ (កូរ៉េខាថត្បូង) កាលពីថ្មីៗនេះ។

លោកឯកអគ្គរាជទូតកម្ពុជាបានថ្លែងប្រាប់កម្ពុជាថ្មី កាលពីម្សិលមិញថា នៅក្នុងអង្គពិធីនោះ លោកបានលើកឡើងពីខ្លឹមសារអត្ថន័យរបស់ថ្ងៃ ៧មករា ថាតើអ្វីទៅជាអត្ថន័យរបស់ថ្ងៃ ៧មករា និងការតស៊ូរំដោះប្រទេស និងរំដោះប្រជាជនកម្ពុជា ឲ្យរួចផុតពីរបបប្រល័យពូជសាសន៍ ព្រមទាំងដើមហេតុ ដែលនាំឲ្យមានការតស៊ូ រើបម្រាស់រំដោះប្រទេសនេះ។ ជាមួយគ្នានោះក៏បានលើកឡើងពីអត្ថន័យ អំពីមូលហេតុ និងអំពីវីរភាពរបស់កងទ័ពរណសិរ្សសាមគ្គីសង្គ្រោះជាតិកម្ពុជា រួមជាមួយកងទ័ពវៀតណាម ក្នុងនោះមានការចូលរួមពីប្រជាជនកម្ពុជាផងដែរ ដើម្បីរើបម្រាស់ចេញពីរបបយង់ឃ្នងខ្មែរក្រហម។

បើតាមលោក ឡុង ឌីម៉ង់ នេះគឺជាសច្ចធម៌ពិតនៃប្រវត្តិសាស្ត្រ ដែលបានកើតឡើងនាពេលកន្លងមក ដូច្នេះត្រូវធ្វើយ៉ាងណាឲ្យស្មារតីថ្ងៃ ៧មករា ស្ថិតនៅគង់វង្សជាដរាប ពីព្រោះ ៧មករា គឺជានិមិត្តរូប នៃសាមគ្គីជាតិ ជាមិត្តនិមិត្តរូប នៃការផ្សះផ្សារជាតិ ការបង្រួបបង្រួមជាតិ និងការកសាង អភិវឌ្ឍន៍ប្រទេស ដែលសុទ្ធតែមានការចូលរួមពីប្រជាជនគ្រប់ស្រទាប់វណ្ណៈទាំងអស់ ដើម្បីប្រែក្លាយប្រទេសកម្ពុជាពីបាតដៃទទេ ក្រោមឈាម និងទឹកភ្នែក គំនរផេះផង់ ឲ្យមានការអភិវឌ្ឍដូចសព្វថ្ងៃនេះ។

ជាមួយនឹងការលើកឡើងខាងលើនេះ លោក ឡុង ឌីម៉ង់ អះអាងថា ដោយសារតែមនោគមវិជ្ជា ដោយសារតែបញ្ហានយោបាយ បានធ្វើឲ្យមនុស្សយល់ខុសៗគ្នា ហើយមុនពេលដល់ថ្ងៃ ៧មករា នេះ តែងតែមានការខ្វែងគំនិតគ្នា ដោយមានការលើកឡើងអំណះអំណាងរៀងៗខ្លួនទាក់ទងបញ្ហាថ្ងៃ ៧មករា នេះ។ ទោះជាយ៉ាងណាក៏ដោយ លោកថា ថ្ងៃ ៧មករា គឺជាសច្ចធម៌ពិត នៃប្រវត្តិសាស្ត្រ ដែលប្រជាពលរដ្ឋទាំងអស់ រួមទាំងអ្នកប្រឆាំង ៧មករា ផង ក៏បានរស់រានមានជីវិត ដោយសារថ្ងៃ ៧មករា នេះដែរ។

ជាមួយគ្នានោះ លោក ឡុង ឌីម៉ង់ ផ្ដាំផ្ញើថា យើងទាំងអស់គ្នាត្រូវធ្វើយ៉ាងណាឲ្យស្មារតី ៧មករា នេះ គង់វង្ស ស្ថិតស្ថេរតទៅ ពីព្រោះ ៧មករា ជាស្នាដៃរបស់យុវជនជំនាន់មុន ហើយដែលពេលនេះ យុវជនជំនាន់ថ្មី ត្រូវតែ “រក្សាចាស់បង្កើតថ្មី” ខិតខំប្រឹងប្រែងរៀនសូត្រ ប្រមូលផ្តុំរាល់បទពិសោធន៍ និងគំរូល្អៗ ហើយនៅពេលត្រឡប់ទៅប្រទេសយើងវិញ ចូលរួមកសាងអង្គភាព គ្រួសារ ក៏ដូចជាប្រទេសជាតិយើងឲ្យរីកចម្រើនតទៅ។

គួររំលឹកថា នៅក្នុងឱកាសខួបលើកទី៤២ នៃទិវាជ័យជម្នះ៧មករា ដែលទើបតែកន្លងទៅថ្មីៗនេះ លោក ឡុង ឌីម៉ង់ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ បានរៀបចំមីទ្ទិញអបអរសាទរខួបអនុស្សាវរីយ៍លើកទី៤២ ទិវាជ័យជម្នះ៧មករា (៧ មករា ១៩៧៩ – ៧ មករា ២០២១) លើរបបប្រល័យពូជសាសន៍ប៉ុលពត តាមរយៈប្រព័ន្ធអនឡាញ (Zoom) ដែលមានតំណាងសមាជិក-សមាជិកា សកម្មជនអ្នកគាំទ្ររាជរដ្ឋាភិបាល ពីគ្រប់តំបន់ទូទាំងប្រទេសកូរ៉េ ប្រមាណ១៧០នាក់ ចូលរួម។

អង្គមីទ្ទិញតាមរយៈអនឡាញ ដែលមានរយៈពេល១ម៉ោង និង៣០នាទីនោះ មានការគោរពភ្លេងជាតិ ច្រៀងបទពង្សាវតារខ្មែរ ទស្សនាវីដេអូឯកសារប្រវត្តិសាស្ត្រ និងអានសាររបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា៕

ដោយ ៖ កោះកែវ