ព័ត៌មានជាតិ

លោក អ៊ិត សំហេង៖ ពលករខ្មែរនៅថៃ នៅតែបន្តលួចលាក់ធ្វើដំណើរវិលត្រឡប់មកស្រុកកំណើតវិញ

បានផុស

៤ years មុន

នៅ

ថ្ងៃសុក្រ ១៥ មករា ២០២១

ដោយ

លោកបណ្ឌិត អ៊ិត សំហេង ប្រធានគណៈកម្មការ ផ្ដល់ភាពស្របច្បាប់ដល់ពលករកម្ពុជា ដែលកំពុងស្នាក់នៅ និងធ្វើការនៅប្រទេសថៃ នៅតែបន្តអំពាវនាវជាថ្មីដល់បងប្អូនពលករ ដែលកំពុងស្នាក់នៅនិងធ្វើការនៅប្រទេសថៃ សូមបន្តស្នាក់នៅ ក្នុងប្រទេសថៃបន្តទៀត នឹងចៀសវាងចល័តពីកន្លែងមួយទៅកន្លែងមួយនាំឲ្យមានហានិភ័យខ្ពស់ក្នុងការឆ្លងជំងឺកូវីដ១៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីអំពាវនាវសារជាថ្មីចំពោះបងប្អូនពលករកម្ពុជា ដែលកំពុងស្នាក់នៅនិងធ្វើការនៅប្រទេសថៃនេះ ធ្វើឡើងដោយសង្កេតឃើញ មានការឆ្លងជំងឺកូវីដ១៩ ក្នុងអំឡុងពេលដែលបងប្អូនពលករនៅប្រទេសថៃធ្វើដំណើរវិលត្រឡប់មកវិញ ដោយលួចលាក់និងខុសពីបម្រាមអាជ្ញាធរថៃ។

លោកបណ្ឌិត អ៊ិត សំហេង ដែលជារដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងនៅថ្ងៃទី១៥មករានេះថា អំឡុងពេលការរាតត្បាតជំងឺកូវីដ១៩នេះ អាជ្ញាធរថៃនឹងមិនមានវិធានការច្បាប់ប្រឆាំងនឹងនិយោជកនិងពលករបរទេស ដែលបានកំពុងធ្វើការនិងស្នាក់នៅមួយកន្លែងនោះទេ។ ផ្ទុយទៅវិញ បើបងប្អូនពលករដែលចល័តពីកន្លែងមួយទៅកន្លែងមួយឬក៏មានបំណងវិលត្រឡប់មកស្រុកកំណើតវិញ គឺប្រឈមនឹងហានិភ័យខ្ពស់ពីការឃាត់ខ្លួន ដោយអាជ្ញាធរមានសមត្ថកិច្ចថៃ និងប្រឈមនឹងលទ្ធភាពឆ្លងជំងឺកូវីដ១៩ ខ្ពស់នៅក្នុងអំឡុងពេលធ្វើដំណើរត្រឡប់នេះ។ លោករដ្ឋមន្ត្រីបានបន្តទៀតថា«សូមបងប្អូនពលករ ដែលកំពុងស្នាក់នៅនិងធ្វើការនៅប្រទេសថៃ មេត្តារក្សាភាពនឹងននិងបន្តស្នាក់នៅជាមួយមួយកន្លែង ដោយពុំទាន់ចាំបាច់ឆ្លងដែនវិលត្រឡប់មកស្រុកកំណើតវិញនោះទេ សូមបងប្អូនជឿទុកចិត្តលើសកម្មភាពនិងលទ្ធភាពទប់ស្កាត់ និងការព្យាបាលជំងឺកូវីដ១៩របស់អាជ្ញាធរថៃ»៕

អត្ថបទ៖ សំអឿន

សូមចុចអាន៖ លោក ហ៊ុន ម៉ានី ឲ្យប្រជាពលរដ្ឋការពារខ្លួនពីជំងឺកូវីដ ក្រោយពលករមកពីថៃមានអ្នកឆ្លងច្រើន