ព័ត៌មានជាតិ

មកដល់ពេលនេះ មានគ្រឹះស្ថានសិក្សាឯកជនគ្រប់កម្រិតជាង៦០០ បានបើកដំណើរការឡើងវិញ

បានផុស

៤ years មុន

នៅ

ថ្ងៃព្រហស្បតិ៍ ២៩ តុលា ២០២០

ដោយ

លោកបណ្ឌិត សភាចារ្យ ហង់ជួនណារ៉ុន រដ្ឋមន្ត្រីក្រសួងអប់រំយុវជននិងកីឡាបានមានប្រសាសន៍ថា រហូតមកដល់ពេលនេះ មានគ្រឹះស្ថានសិក្សាឯកជនគ្រប់កម្រិតចំនួន៦៦៦សាលាបានបើកដំណើរការឡើងវិញរួចរាល់ហើយ នៅក្នុងដំណាក់កាលទី២នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុងសន្និសីទបើកដំណើរការសាលារៀនឡើងវិញ នៅទីស្តីការក្រសួង លោករដ្ឋមន្ត្រីបានបន្តថា ក្នុងចំណោម៦៦៦សាលានោះ មាន៤០០សាលាមាននៅភ្នំពេញ និង២៦៦ទៀតមានទីតាំងនៅតាមខេត្ត។ លោករដ្ឋមន្ត្រីបានបន្ថែមទៀតថា«សាលាទាំងនោះ បានបើករួចរាល់ហើយនៅក្នុងដំណាក់កាលទី២ ដែលបានចាប់ផ្តើមតាំងពីថ្ងៃទី០៧ ខែកញ្ញា ឆ្នាំ២០២០មកម្ល៉េះ»។ លោករដ្ឋមន្ត្រីបានបន្តទៀតថា ប៉ុន្តែមុននឹងអនុញ្ញាតឲ្យសាលាទាំងនោះបើកដំណើរការឡើងវិញនេះ ក្រសួងបានចុះត្រួតពិនិត្យតាមសាលានីមួយៗទាក់ទិននឹងបរិស្ថានសាលាពិសេសការអនុវត្តតាមស្តង់ដារប្រតិបត្តិរបស់ក្រសួងសុខាភិបាលនិងក្រសួងអប់រំយុវជននិងកីឡា ដើម្បីបង្ការការពារកុំឲ្យមានការឆ្លងរីករាលដាលជំងឺកូវីដ១៩ និងមានការចុះអនុស្សរណៈយោគយល់គ្នារវាងគ្រឹះស្ថានសិក្សាឯកជនទាំងនោះជាមួយក្រសួងផងដែរ។

លោករដ្ឋមន្ត្រីបានរំលឹកថា នៅដំណាក់កាលទី២នេះ ក្រសួងមិនត្រឹមតែអនុញ្ញាតឲ្យសាលាឯកជនគ្រប់កម្រិតបើឡើងវិញនោះទេ ក្រសួងក៏អនុញ្ញាតឲ្យសាលាគ្រឹះស្ថានសិក្សាសាធារណៈ ដែលមានសិស្សថ្នាក់ទី៩ និងថ្នាក់ទី១២ទូទាំងប្រទេស និងគ្រឹះស្ថានសាធារណៈគ្រប់កម្រិតនៅតាមទីរួមខេត្តចំនួន៤ ដែលមានកម្រិតហានិភ័យទាប (ទីរួមខេត្តក្រចេះ ស្ទឹងត្រែង រតនគីរី និងមណ្ឌលគីរី) បើកដំណើរការឡើងវិញចាប់ផ្តើម ថ្ងៃទី០៧ ខែកញ្ញា ឆ្នាំ២០២០។ ក្រៅពីនេះ ក្រសួងនឹងពិនិត្យលទ្ធភាពជាក់ស្តែងបើកដំណើរការគ្រឹះស្ថានសិក្សាសាធារណៈតាមរាជធានី ខេត្តផ្សេងទៀតតាមទ្រង់ទ្រាយតូច។ លើសពីនេះទៀត ក្រសួងអប់រំបានអនុញ្ញាតឲ្យគ្រឹះស្ថានសិក្សាឯកជនពីកម្រិតមត្តេយ្យសិក្សាដល់ឧត្តមសិក្សាបើកដំណើរការឡើងវិញ ផងដែរ។ ប៉ុន្តែ គ្រឹះស្ថានសិក្សាឯកជនទាំងនោះត្រូវដាក់ពាក្យស្នើសុំបើក មកក្រសួងអប់រំ តាមរយៈមន្ទីរអប់រំ យុវជន និងកីឡានិងត្រូវចុះកិច្ចព្រមព្រៀងជាមួយក្រសួងអប់រំមុនបើកដំណើរការជាផ្លូវការ។

លោក ហេង វ៉ាន់ដា ប្រធានសមាគមគ្រឹះស្ថានឧត្តមសិក្សានៅកម្ពុជាបានមានប្រសាសន៍ថា ទោះបីជាបើកសាលាឡើងវិញ ក៏ពិតមែន ប៉ុន្តែមិនមែនបើកឲ្យចូលរៀនលក្ខណៈជាគំហុកនោះទេ គឺនៅតែប្រកាន់ខ្ជាប់នូវស្តង់ដារប្រតិបត្តិរបស់ក្រសួងអប់រំយុវជននិងកីឡានិងក្រសួងសុខាភិបាលដដែល។ លោកបានបន្ថែមទៀតថា ការបើកសាលាឡើងវិញនេះ គឺត្រូវអនុវត្តទៅតាមគន្លងថ្មី តាមបែបជីវភាពរស់នៅថ្មីរបស់សិស្សនិងនិស្សិត សំដៅធ្វើយ៉ាងណាការពារនិងគាំពារទាំងសិស្សនិងបុគ្គលិករួមទាំងសាលាផងឲ្យមានជីវិតរស់រវើក ដោយមិនមានការបាត់បង់ជីវិត និងប្រការណាមួយ ដែលនេះជាគោលនយោបាយរបស់វិស័យឯកជនចូលរួមជាមួយក្រសួងអប់រំយុវជននិងកីឡា។

លោករដ្ឋមន្ត្រីបានបញ្ជាក់ថា បន្ទាប់ពីបើកដំណើរការសាលាឡើងវិញនៅដំណាក់កាលទី២ ដោយរលូនរួចមកក្រសួងនឹងចាប់ផ្តល់បើកសាលាឡើងវិញ នៅដំណាក់កាលទី៣បន្តទៀតពីថ្ងៃទី២ខែវិច្ឆិកា ដល់ដំណាច់ខែធ្នូឆ្នាំ២០២០ មុននឹងបើកបវេសនកាលថ្មីនៅថ្ងៃទី១១ ខែមករា ឆ្នាំ២០២១ខាងមុខនេះ៕

អត្ថបទ៖ សំអឿន

សូមចុចអាន៖ ផ្អាកចរាចរបណ្ដោះអាសន្ន លើកំណាត់ផ្លូវលេខ២៨៧ ចាប់ពីផ្លូវលេខ ៥៦៦ ដល់ផ្លូវលេខ ៦០៨