ព័ត៌មានជាតិ

ស្លាប់១៥នាក់ ឆ្លងជាង១ម៉ឺននាក់ ដោយសារជំងឺគ្រុនឈាម

បានផុស

៤ years មុន

នៅ

ថ្ងៃអង្គារ ៣ វិច្ឆិកា ២០២០

ដោយ

Sorn Phanith

នៅក្នុងរយៈពេល១០ខែឆ្នាំ២០២០នេះ មានកុមារកម្ពុជាឆ្លងជំងឺគ្រុនឈាមចំនួន១០៤៦៤ ករណី ក្នុងនោះស្លាប់ចំនួន១៥នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត ហ៊ុយ រ៉េកុល ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្រនិងបាណកសាស្ត្រ បានមានប្រសាសន៍នៅរសៀលថ្ងៃទី៣វិច្ឆិកានេះថា ចំនួននេះបើធៀបទៅនឹងរយៈពេល១០ខែដូចគ្នាឆ្នាំ២០១៩កន្លងទៅឃើញថា មានការថយចុះរហូតដល់ទៅ៦០០ភាគរយនិងចំនួនអ្នកស្លាប់ថយចុះប្រមាណ៣០០ភាគរយ។ លោកវេជ្ជបណ្ឌិត បានលើករបាយការណ៍មកបញ្ជាក់ថា ១០ខែឆ្នាំ២០១៩កន្លងទៅមានកុមារឆ្លងជំងឺគ្រុនឈាមចំនួន៦៤៥៦០ករណី ក្នុងនោះស្លាប់ចំនួន៤៥នាក់។

លោកវេជ្ជបណ្ឌិតបានបន្តទៀតថា ករណីជំងឺគ្រុនឈាមនៅឆ្នាំនេះនឹងបន្តថយចុះជាបន្តបន្ទាប់ទៀតដោយសារ ប្រជាពលរដ្ឋមានការយល់ដឹងនិងបានចូលរួមលុបបំបាត់ជម្រកមូសខ្លាដូចជាដូចជាសំបកកង់ឡាន ម៉ូតូ សំបកដបកំប៉ុងត្រឡោកដូង។ រៀបចំធ្វើអនាម័យផ្ទះសំបែងបានស្អាតល្អ ពិសេសពេលមានករណីរោគសញ្ញាក្រៅខ្លួនខ្លាំងភ្លាមៗពួកគាត់ បាននាំអ្នកជំងឺទៅរកសេវាពិនិត្យនិងព្យាបាលរបស់រដ្ឋដូចជាមណ្ឌលសុខភាពនិងមន្ទីរពេទ្យបានទាន់ពេលវេលា។

លោកវេជ្ជបណ្ឌិតបានបញ្ជាក់ទៀតថា ក្រៅពីនេះការថយចុះនេះ ក៏មានការចូលរួមពីអាជ្ញាធររាជធានីខេត្តថ្នាក់ដឹកនាំក្រសួងសុខាភិបាលនិងអង្គការក្រៅរដ្ឋាភិបាលផងដែរ។ យ៉ាងណាក៏ដោយ លោកវេជ្ជបណ្ឌិតបានក្រើនរំលឹកដល់ប្រជាពលរដ្ឋអាជ្ញាធររាជធានីខេត្តនិងអង្គការដៃគូបន្តចូលរួមប្រយុទ្ធនឹងជំងឺគ្រុនឈាមជាបន្តទៀត ដើម្បីកាត់បន្ថយអត្រាឈឺនិងស្លាប់របស់កុមារដោយសារជំងឺនេះឲ្យកាន់តែថយចុះថែមទៀត៕

អត្ថបទ៖ សំអឿន

សូមចុចអាន៖ លោក សុខ ទូច ប្ដេជ្ញាធ្វើជាគំរូប្រើដបទឹកធ្វើពីបំពង់ឫស្សី

Related Topics:ជំងឺគ្រុនឈាម