ចំនួនអ្នកស្លាប់ដោយកូវីដ ក្នុងមួយថ្ងៃនៅអាមេរិកអាចវ៉ាដាច់ជនរងគ្រោះនៅព្រឹត្តិការណ៍វាយប្រហារ ៩/១១

នាយកមជ្ឈមណ្ឌលទប់ស្កាត់ និងបង្ការជំងឺ (CDC) លោក Robert Redfield បានចេញការព្យាករណ៍ថា បើយោងតាមនិន្នាការបច្ចុប្បន្នចំនួនអ្នកស្លាប់ដោយសារជំងឺកូវីដ ១៩ ដែលត្រូវបានកត់ត្រាក្នុងមួយថ្ងៃនៅសហដ្ឋអាមេរិក អាចវ៉ាដាច់ពីការស្លាប់ក្នុងព្រឹត្តិការណ៍វាយប្រហារ ៩/១១ ឬនៅកំពង់ផែ Pearl Harbor ។

ការព្រមាននេះធ្វើឡើងក្រោយពេលដែលអាជ្ញាធរសុខាភិបាលបានបញ្ជាក់ពីចំនួនអ្នកស្លាប់ច្រើនជាង ៣,០០០ នាក់ពីជំងឺកូវីដ ១៩ ក្នុងរយៈពេល ២៤ ម៉ោងចុងក្រោយ ។

លោក Redfield បាននិយាយនៅក្នុងព្រឹត្តិការណ៍មួយដែលរៀបចំឡើងដោយក្រុមប្រឹក្សា CDC ស្តីពីទំនាក់ទំនងបរទេសកាលពីថ្ងៃព្រហស្បតិ៍ថា “យើងស្ថិតនៅក្នុងពេលវេលាដែលប្រហែលជា ៦០ ទៅ ៩០ ថ្ងៃទៀតយើងនឹងមានអ្នកស្លាប់ក្នុងមួយថ្ងៃច្រើនជាងយើងមាននៅព្រឹត្តិការណ៍ ៩/១១ ទៅទៀត” ។

ស្របពេលជាមួយគ្នានេះក្រុមប្រឹក្សាផ្នែករដ្ឋបាលចំណីអាហារ និងឪសថអាមេរិក (FDA) បានអនុម័តវ៉ាក់សាំងការពារជំងឺកូវីដ ១៩ របស់ក្រុមហ៊ុន Pfizer ដើម្បីប្រើប្រាស់លើជនជាតិអាមេរិក ខណៈពេលដែលអ្នកជំនាញព្យាករណ៍ថា ការថយចុះចំនួនករណីឆ្លងប្រហែលជារហូតដល់ខែកុម្ភៈ ទោះបីមានការចាក់វ៉ាក់សាំងក៏ដោយ ។

គួរបញ្ជាក់ថា គិតត្រឹមពេលនេះសហរដ្ឋអាមេរិកមានករណីឆ្លងជំងឺកូវីដ ១៩ ច្រើនជាង ១៥.៥ លាននាក់ ហើយយ៉ាងហោចណាស់មនុស្ស ២៩២,០០០ នាក់បានស្លាប់ ខណៈចំនួនអ្នកស្លាប់ក្នុងព្រឹត្តិការណ៍វាយប្រហារ ៩/១១ មានចំនួន ២,៩៩៦ នាក់ និងជាង ៦,០០០ នាក់ផ្សេងទៀតរងរបួស ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ មន្ទីរបញ្ចកោណដាក់ពង្រាយយន្តហោះទម្លាក់គ្រាប់បែកនុយក្លេអ៊ែរ B-52 ទៅតំបន់មជ្ឈិមបូព៌ា

ចុចអាន ៖ ក្រុមប្រឹក្សាអាមេរិកយល់ព្រមឲ្យចាក់វ៉ាក់សាំងកូវីដរបស់ក្រុមហ៊ុន Pfizer-BioNTech