KPT+

រឿង ៧ យ៉ាងដែលអ្នកជាឪពុកគួរតែបង្រៀនទៅកាន់កូនប្រុស

បានផុស

៤ years មុន

នៅ

ថ្ងៃព្រហស្បតិ៍ ៧ មករា ២០២១

ដោយ

Sonya

ការសិក្សាថ្មីៗបានបង្ហាញថា ឪពុកកាន់តែចូលរួមជជែកជាមួយកូនច្រើនប៉ុណ្ណា គេនិងទទួលបានភាពស្និទ្ធស្នាលជាមួយឪពុកប៉ុណ្ណឹងដូចគ្នា។ និយាយជាមួយកូនមុនពេលចូលគេង នោះគេនឹងស្ងប់ស្ងៀមដើម្បីត្រៀមខ្លួនស្ដាប់ ។ ចំណាយពេលនៅចុងសប្ដាហ៍ជាមួយកូន ហើយធ្វើអ្វីដែលរីករាយជាមួយគេ ក៏ជាការអប់រំយ៉ាងសម្ងាត់មួយផងដែរ។ ទាំងនេះហៅថា វិធីបង្រៀនកូនប្រុសពីរបៀបរស់នៅតាមរយៈសកម្មភាពប្រចាំថ្ងៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រៅពីនោះ មានរឿងសំខាន់ ៧ យ៉ាងទៀតដែលឪពុកគួរតែបង្រៀនកូនប្រុសដើម្បីយចាប់ផ្ដើមទំនាក់ទំនងល្អជាមួយគេ ក៏ដូចជាជំរុញគេឲ្យក្លាយមនុស្សល្អទាំងពេលបច្ចុប្បន្ន និងអនាគត។

១. ប៉ាស្រឡាញ់កូន

ប្រហែលជារឿងពិបាកមួយសម្រាប់ឪពុកក្នុងការនិយាយពាក្យនេះ។ លោកអាចរឹងអណ្ដាត តែចំពោះកូនប្រុសគេត្រូវការស្ដាប់វាខ្លាំងណាស់។ ដូច្នេះគួរពោលពាក្យបីម៉ាត់នេះរាល់ថ្ងៃឲ្យកូនបានឮ ដើម្បីឲ្យគេកក់ក្ដៅផ្លូវចិត្តនិងចេះចែកក្ដីស្រឡាញ់ទៅកាន់មនុស្សជុំវិញខ្លួនគេដែរ។

២. “មិនអីទេ” និយាយនៅពេលកូនធ្វើខុស

ប្រាប់កូនថា ការធ្វើខុសជាមេរៀនដែលត្រូវរៀនសូត្ររបស់មនុស្សគ្រប់គ្នា។ តែក៏ត្រូវបង្រៀនគេឱ្យចេះកែកំហុសនិងជួសជុលការខូចខាតដូចគ្នាដែរ។ រំឭកពួកគេរឿយៗថា កំហុសតែងបង្រៀនយើងឱ្យក្លាយជាមនុស្សល្អ ករណីយើងចេះកែប្រែវា។ ចៀសវាងស្ដីបន្ទោស ជេរប្រទេច នាំឲ្យគេធ្វើខុសលើសដើម។

៣. ប្រកាន់ភាពស្មោះត្រង់

ប្រសិនបើចង់ឲ្យកូនប្រុសស្វែងរកភាពជោគជ័យពិតនៅក្នុងជីវិត សូមបង្រៀនគេពីភាពស្មោះត្រង់ដោយធ្វើជាគំរូដល់គេរាល់ថ្ងៃ។ ប្រាប់កូនថា ការរក្សាភាពស្មោះត្រង់នឹងធ្វើឱ្យគេក្លាយជាបុរសអស្ចារ្យនាពេលអនាគត ព្រោះសុចរិតភាពរមែងតបស្នងនូវការគោរពកគ្រប់ពេល។

៤. ធ្វើរឿងត្រឹមត្រូវ ទោះបីលំបាកក៏ដោយ

ធ្វើជាបុរសពិតគឺចាំបាច់ប្រកាន់រឿងត្រឹមត្រូវ ទោះបីលំបាកក៏ដោយ កុំយកលេសឲ្យសោះ ហើយត្រូវទទួលខុសត្រូវចំពោះសកម្មភាពខ្លួនឯង។ ទោះបីជារឿងខ្លះពិបាកសម្រាប់គេក្នុងការរៀនពីដំបូងក៏ដោយ តែវានឹងមានតម្លៃនៅពេលពួកគេធំឡើង។

៥. ការខិតខំធ្វើការ និងតស៊ូ

អប់រំកូនឱ្យខិតខំបញ្ចប់ការងារ ដើម្បីជួយគេឲ្យចេះរស់នៅដោយខ្លួនឯង ពេលណាគ្មានឪពុកម្ដាយ។ គេនឹងរៀនសម្រេចគោលដៅ ហើយថែមទាំងប្រឹងសម្រេចក្ដីសុបិនរបស់គេថែមទៀត។ ការរៀនដោយមិនចុះចាញ់នឹងធ្វើឱ្យគេនៅតែតស៊ូសូម្បីតែពេលលំបាកខ្លាំងក៏ដោយ។

៦. គោរពស្ត្រីភេទ

បង្ហាញកូនប្រុសពីរបៀបមើលថែអនាគតភរិយាដោយការគោរព ផ្ដល់សេចក្ដីថ្លៃថ្នូរ និងឲ្យតម្លៃចំពោះនាង។ ប្រាប់គេក្នុងនាមជាបុរសម្នាក់ត្រូវមានទំនួលខុសត្រូវ ស្រឡាញ់ប្រពន្ធ និងគ្រួសារ។ បង្ហាញគេច្បាស់ៗពីទំនាក់ទំនងជាមួយគ្រួសារថាជារឿងសំខាន់បំផុតនៅក្នុងពិភពលោក ដែលជាអាទិភាព មុនធ្វើអ្វីផ្សេង។

៧. តួនាទីកូនប្រុសដែលជាមេគ្រួសារ

មិនថាមានអ្វីកើតឡើង អ្នកជាឪពុកនឹងនៅទីនោះសម្រាប់កូនជានិច្ច។ ជីវិតនឹងជួបឧបសគ្គសម្រាប់កូនៗ ហើយគេនឹងអាចយកឈ្នះបាន ប្រសិនបើដឹងថា គេតែងតែមានការគាំទ្រពីឪពុកក្នុងគ្រាលំបាកនានា។ ចូរក្លាយជាអ្នកគាំទ្រដ៏ធំបំផុតសម្រាប់គេ នោះទំនាក់ទំនងឪពុកកូននឹងកាន់តែរឹងមាំ ជាពិសេសកូនៗនឹងមើលគំរូតាមសកម្មភាពអ្នកមានគុណដែលពោរពេញដោយទំនួលខុសត្រូវ និងប្រកបជាមួយភាពកក់ក្ដៅជានិច្ច៕

ប្រែសម្រួល៖ សាង ស្រីល័ក្ខ

ចុចអាន៖ ពាក្យថា «ឪពុក» ភ្ជាប់លក្ខខណ្ឌនិងកាតព្វកិច្ចអ្វីខ្លះសម្រាប់គ្រួសារ?

ចុចអាន៖ សកម្មភាពចិញ្ចឹមកូន៤យ៉ាងដែលឪពុកម្ដាយសម័យថ្មីនិយមធ្វើ